Auzitegi Gorenaren epaia ez da behin betikoa. Hau da, errekurritu egin daiteke, Konstituzionalean, kasu honetan. Baina inputatuen abokatuak Manueli adierazitakoaren arabera, "oso arraroa" da epaitegi goren horretara jotzea; beraz, uste eta espero dute ez dutela errekurtsorik aurkeztuko.
"Orain sententzia begiratu egin beharko dugu; batez ere, aurrekari izan daitekeelako aurrera begira presoen argazkiak erakusteko orduan", esan du Iñaki Manuel bergararrak.
Zigorraren mugan
Berri agentzien arabera, inputatuen jokabidea "anbiguoa" den arren, ezin daiteke bete-betean kontsideratu "terrorismoaren goraipatze edo legitimitatea" aldarrikatzen dutenik. "Zigorraren muga-mugan leudeke jarrera horiek; izan ere, ez berezko izaeragatik eta ezta ere testuinguruarengatik (euskara bultzatzeko lasterketa baten baitan izan zen) ezin dira bete-betean terrorismoaren aldarrikapen edo legitimitate moduan kontuan hartu", dio sententziak. "Testuinguruari buruz, garrantzitsua dena da konnotazio politikoak zituen ekimen bat izan zela, baina batez ere, kulturala".