Plataforma berri bat sortzeko elkarretaratzea egin dute

Bazkideek egin dute elkarretaratzea, Fagor Etxetresnek San Andres auzoan duten plantan. Besteak beste, "egoeraren gaineko informazio faltaren" eta "Enplegu Bulego Korporatiboaren erantzun ezaren" inguruan hitz egin dute. Indarrak batzeko, Bazkideak Betirako taldea ere eratu dute kaltetuek, gaurko batzarraren emaitz modura. Helburu nagusia "bazkide izaera sekula ere ez galdu ahal izatea da" eta honezkero gaiaren inguruan lanean diharduten gainerako talde eta plataformekin lankidetza gura dute. Goizero batzartu direla diote, 10:00etan Hozkailuetan, San Andresen.

11:30erako zegoen deituta elkarretaratzea, baina langileek Fagor Etxetresnen San Andreseko hozkailuen plantara sartu eta plataforma berri bat eraikitzen hasteko lehenengo pausoak eman dituzte. Bi ordu inguru eman dituzte barruan, bilduta.

Bazkide bakoitzaren egoera kontutan hartzea eta Enplegu Bulego Korporatiboaren "arazoa" konpontzea izango dira, besteak beste, plataforma berriaren helburuak. "Informazio falta" ere salatu dute, izan ere, bazkideek adierazi dute ez dutela negoziazioen nondik norakoen berririk. Haserrea agerikoa zen elkarretaratzean zeuden bazkide askoren artean.

Eguenean, beste bat

Eguenean, beste elkarretaratze bat egingo dute 12:00etan San Andreseko plantan, eta bazkide guztiei deialdia zabaldu diete, denen parte-hartzea "oso garrantzitsua" izango delako aurrera begirako ekintzak zehazten joateko.

Biharko, bestalde, kontzentrazioa deitu dute Gasteizen, Fagor Etxetresnen egoeraren harira Lakuan bilera egingo dutela-eta, eta hara joateko autobusak irtengo dira Arrasatetik. 10:30ean aterako dira San Andreseko plantatik eta autobusean joateko gaur eman beharko da izena, harreran.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.