Fagor Etxetresnek Espainiako Balio-merkatuaren Batzordeari atzo jakinarazi zioten Haierren erabakia, baina dagoeneko egubakoitzean hartuta zegoen erabaki hori.
Fagor Etxetresnek esan dutenez, kooperatibaren egoera dela-eta, ezin du Haierrekiko zituen konpromisoak bete, eta horregatik gertatu da apurketa.
Joan den irailean jakinarazi zuten bi enpresek joint venture hori egingo zutela. Haierrek zuen gehiengoa: % 51. Fagor Etxetresnen itxaropena zen nazioartean, batez ere Asian, indarra hartzea eta merkatu estrategikoetan haztea. Hain zuzen ere, 2013-2016 Plan Estrategikoan jasotzen zen hazkunde-planean sartzen zen txinatarrekiko akordioa.
Haierrek, bere aldetik, Europan indartzea zuen helburuetako bat, eta Fagorrek Polonian, Wroclaw hirian duen lantegiarekin interesatuta zegoen, batez ere, eta lantegi berri bat egiten hastekoak ziren Polonian. 56 milioi euroko hasierako inbertsioa aurreikusten zen. Sektorean aitzindaria zen joint venture hori. Planen arabera, 500.000 hozkailu egiten hasiko ziren biak batera, eta, bost urtean, milioi bat ale ekoiztuko zituzten.