Aurte ere herritar ugari joan dira Debagoieneko kanposantuetara, hildako senide eta lagunak gogoan dituztela. Landare mota ezberdinak, krisantemoak eta lora ezberdinez osatutako zentroak jarri dituzte askok hilobi gainetan.
Angiozarren, bestalde, heriotzari buruzko bisita gidatua egin dute. Bergarako turismo bulegoko Jon Arroitak gidatu du bisita eta bi ordu inguruko ibilaldian, zentzu erlijiosoaz gainera, inguru kulturala eta garai bateko bizimodua ezagutu dute bisitan parte hartu dutenek. Euskarazko bisita egin dute gaur eta bihar, zapatua, gazteleraz egingo dute ibilbide bera, hasi Elizamendi ermitan eta San Migel parrokiarainokoa. 11:00etan abiatuko da.
Bisita gidatuen osagarri, erakusketa bat ere badago zabalik: atal bat elizan dago ikusgai eta bestea Saloian.