Edesako 230 langileek itxialdia hasiko dute martitzenean

Basauriko lantegiko 230 langileek itxialdia egingo dute martitzenetik aurrera. Hala erabaki zuten atzoko Kontseilu Sozialean, beldur baitira, zenbait komunikabidetan azaldu dutenez, langileen birkokatzeetan Lagun Aroko langileek lehentasuna izan dezaketelako Korporazioarentzat, Edesakoak bere garaian ez ziren-eta Lagun Aroko EPSVra batu. Arrasateko langileei dagokienez, ez dute ezer erabaki. Martitzenean bertan batzartuko da atzera ere Kontseilu Soziala eta orduan aztertuko dute gaia.

Martitzenean, azaroak 5, sartuko dira Basauriko Edesako langileak itxialdian. Ataka estuan ikusten dute bereziki euren egoera; kooperatibista izanda ere, Gizarte Segurantzan kotizatzen jarraitu baitute, 90 hamarkadan Fagorrera batu arren. Egoera berezi horren ondorioz, beldur dira Mondragon Korporazioa ez ote den lehenago Arrasateko lantegiko langileak birkokatzen saiatuko, horiei Lagun Arok ordaintzen baitie langabezia.

Horren aurrean eta lanpostuen defentsan, martitzenetik aurrera itxialdiari ekingo diotela iragarri dute Edesako beharginek.

Fagor Etxetresnetako langileei dagokienez, Basauriko lankideen erabakiaren asmoa Kontseilu Sozialaren egueneko batzarrean jakin zuten. Eurek ere itxialdia egingo duten ala ez, datorren martitzenean erabakiko dute, Kontseiluaren hurrengo batzarrean, hain justu, Andoni Azkargorta Kontseilu Sozialeko kideak baieztatu duenez.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.