Bigarren bilera hasi aurretik diputatu nagusiak aipatu duenez, batzar honetan, "herri bakoitzak duen egoera mapa bat osatu nahi dugu, arazo honi zein konponbide eman diezaiokegun aztertzeko". Horren ostean, azken informazioak ez direla onak aipatu eta Fagor Etxetresnen erabakia Aldundiaren esku ez dagoen arren, "langile, arduradun eta kooperatiben ondoan daudela" azpimarratu du. Zentzu honetan, eragile guztiei batzeko dei egin die eta "bakoitzak bere erantzukizun eta neurriak" hartzeko garaia dela azaldu du.
Eredu bat kolokan
Garitanok azpimarratu duenez, Fagor Etxetresenen auzian, "Eusko Jaurlaritzak erabaki sendo bat hartu behar du" eta horren ostean "kooperatiben marka, Basque Country marka, familiak, ekarpenak... jokoan daude" aipatu du. Bilera hasi aurretik "gipuzkoar gehienok maite dugun eredu bat kolokan dago eta zintzoak izan behar dugu" gaineratu du diputatu nagusiak.
Oxel Erostarbe agenda kontuengatik ez da egon
Elgetako alkate den Oxel Erostarbe ez da bigarren bilera honetan ere egon. Inazio Azkarragaurizar Arrasateko alkateak "etortzekoa zen baina azken unean, agenda kontuengatik ez dela etorri" azaldu du. Lehen bileran aldiz, "akats bat" egon zela onartu eta Erostarbek ez zuela gonbidapenik jaso azaldu du Azkarragaurizarrek.