"Irtenbide horren kontra gaude, eta urratsak emango ditugu aldi baterako langileak eta zuzenean zein zeharka azpikontratatuta daudenak defenditzeko. ELAk Eusko Jaurlaritzari exijitzen dio MCCko langile guztien alde egin dezala, bazkide diren ala ez alde batera utzita", azaldu dute sindikatutik.
Diotenez, urriaren 16an Fagor Etxetresnek aurre-konkurtsoa iragarri zutenetik, ELA "arreta bereziz" ari da jarraitzen enpresa horri buruzko informazioa: "Egoera oso larria da hau, Euskal Herriko enpleguan eta sare industrialean eragin handia duena, baina gainera sindikatu honek gogora arazi nahi du gai honetan baduela parte izateko arrazoirik, izan ere, bat batean lanik gabe geratu den jende askoren ordezkari baita, esaterako, Edesako langileena nahiz beste enpresa batzuetako beharginena, zeinei egoerak nolabait eragiten baitie".
Bilera eskaera
ELAk parte hartu zuen joan den urriaren 18an Arrasaten Kontseilu Sozialak deitu zuen manifestazioan, eta iragarri du bat egingo duela korporazioko lanpostuen alde egin daitezkeen mobilizazioetan. Horrez gain, sindikatutik jakinarazi dute, kooperatiba horretako zuzendaritzari bilera bat eskatu diotela, "egoeraren berri zehatzagoa" izate aldera, baina oraingoz ez dutela hitzordurik jarri.