Enplegu garbirik sortuko ez dela uste du Eusko Jaurlaritzak; horregatik, enplegua berpizteko inbertsio handia egin nahi dute, 1.000 milioi eurokoa, hain zuzen ere. Enplegu eta Gizarte Politika sailaren aurrekontua da gehien haziko dena: % 19,7. Denetara, 952 milioiko dotazioa izango du. Diru-poltsa nagusiak bi izango dira: batetik, Diru-sarrerak Bermatzeko Errenta eta Etxebizitzarako Prestazio Osagarria ordaintzeko 384,5 milioi izango ditu; eta Gizarte Segurantzarako bonifikazioetarako, 119,9 milioi. Gizarte Larrialdiko Laguntzak ordaintzeko partida % 18,5 handiagoa izango da.
Gatzagaetxeberriaren esanetan, Eusko Jaurlaritzak bi helburu handi izango ditu 2014an: eredu sozioekonomikoari eustea eta berau hobetzea, eta enplegua sortzea. Euskal ekonomia oso ahul haziko dela esan du, % 0,9.
Hezkuntza, Hizkuntza Politika eta Kultura Sailaren aurrekontuak 130,5 milioi euro gehiago izango ditu, aurten baino % 5 gehiago. Beketarako 80,3 milioi euro ipiniko ditu Eusko Jaurlaritzak.
Ingurumen eta Lurralde Politika da gehien haziko den sailetako beste bat: % 9,5, hain zuzen. Eusko Trenbideak eta Eusko Trenbide Sareak erakundeen finantzazio-beharrek gora egingo dute, batez ere Gipuzkoan eta Bizkaian.
Osasun Sailaren aurrekontua % 2,7 handituko da, batez ere, Osakidetzarekiko kontratu programaren aurrekontua dela-eta; horrek Osasun Sailaren aurrekontuaren hiru laurdenak baino gehixeago hartuko du.
Ekonomiaren Garapen eta Lehiakortasun Sailak aurten baino % 4,9 diru gehiago izango du.
Ricardo Gatzagaetxeberriak esan duenez, aurrekontua 900 milioi handiagoa izan arren, amortizazioak askoz handiagoak izango dira: aurten 200 milioi baino gutxixeagokoak ziren, eta datorren urtean, 538 milioikoak izango dira. Beraz, "benetako hazkundea" 561 milioi eurokoa da.
Fagor Etxetresnen gainean hitz egin du gero Josu Erkoreka bozeramaileak. Kazetarien galderei erantzunez, esan du Eusko Jaurlaritza gertu dagoela Mondragon Korporazioarekin Fagor Etxetresnen bideragarritasun eta berregituratze plana egiteko ardura konpartitzera, baina enpresak hartu behar dituela erabakiak.
Hemendik aurrera, Legebiltzarreko taldeek bi hilabeteko epea dute emendakinak aurkezteko. Abenduaren bukaeran eztabaidatuko dute aurre-proiektu hori.