ELA sindikatuak sektore ezberdinetan antolatu ditu mobilizazioak aste honetan zehar, eta sindikatutik adierazi dutenez, asmoa da lan hitzarmenik gabe geratu diren langileei, antolatuz, euren baldintzak hobetzeko aukera ematea.
Hala, ospitale eta anbulatorioetako garbitasuneko langileen artean greba dago deituta; Gipuzkoa mailan baita garbitasun sektore osoko langileen artean ere eta hainbat enpresatan mobilizazioak ere egingo dituzte. Honetaz gainera, eguenerako ekitaldi konfederala eta manifestazioa egingo dute Bilbon.
Gaurko elkarretaratzeekin administrazio publikoan, eta zehatzago esateko osasungintza arloan egon diren murrizketak eta lan baldintza aldaketak salatu gura izan dituzte. Aldaketa hauek dekretuz onartu direla azpimarratu dute, eta gaineratu dute elkarretaratzeetan, langileek ez ezik, erabiltzaileek ere hartu dutela parte.