Besaide elkarteak biharko antolatu duen martxak ibilbide ikusgarria izango du (Hemen kartela, eta ibilbidea googlemaps-en). Martxa Musakolako kiroldegian hasiko dute (09:00). Kurtzetxiki igo ostean, Izurietatik pasa eta Ikutixoko jaitsierara iritsiko dira. Jatekoen eta edatekoen ostean Udalara igoko dira; han, sorpresa berriren bat izango dute, eta Enduro Bonus zati klasikoa eta gero, ziklistek Udalatik Arrasateraino jaisten den bidezidor berria estreinatuko dute –izango da aukera errazagoa. Ibilbide luzeak 35km eta 1400 metroko aldea dauka eta motzak 27km eta 1000 metrokoa. Aurtengo ibilbide ia guztia bidezidorretatik igaroko denez, antolatzaileek "oso martxa dibertigarria" izango dela aurreratu dute.
Domekan Eskoriatzan
Zapatuan bizikleta apur bat txukundu ostean, domekan lan gehiago eurendako. Eskoriatzako plazatik irtengo da 24. Mendi Bizikleta Ibilaldia, 09:00etan (hemen kartela). Ibilbide luzeak 39 kilometro izango ditu, eta ibilbide motza aukeratzen dutenek lasaiago ibili ahal izango dute, 10:30ean hasiko delako bigarren martxa hori (11 kilometro izango ditu, gaztetxoendako aproposa).Antolatzaileek argi utzi dute "ibilaldia dela, ez lehiaketa", eta "segurtasun arauak une oro errespetatzea" eskatzen dute.
Bi frogetako izen ematea egunean bertan egin beharko da, proba hasi baino lehenago.