Zapaturako, hilak 19, manifestazioak deitu dituzte Gasteiz, Bilbo, Iruñea eta Donostian ELA, LAB, ESK, STEE-EILAS, EHNE, HIRU, CNT eta CGT sindikatuek eta hainbat gizarte eragilek. "PPren Gobernuaren pentsio erreforma salatu eta haren kontra borrokatuko" dutela esan dute deitzaileek. direla iragartzeko.
GUNE plataforma osatzen duten sindikatu eta eragileek deitutako mobilizazioak bost arrazoi nagusiren bueltan egingo dira. Deitzaileen hitzetan, hauek dira:
- Pentsioak eskubide -eta ez negozioa- direla aldarrikatzeko.
- Pertsona guztientzako pentsio duinak eskatzeko.
- Pentsio berrien zenbatekoa eta eroste ahalmena gutxitzen dituzten murrizketei uko egiteko.
- Pentsioen gaineko legeria Euskal Herrian erabakitzeko eskatzeko.
- Hego Euskal Herriko erakundeei pentsio publiko duinak berma ditzaten eskatzeko, eta Madrilen onetsitako erreformen ondorioak konpentsatzeko osagarria ezar dezaten eskatzeko.
"Gazte, pentsiodun, langabetu, langile, ordaindu gabeko etxeko zaintzaileei, egoera prekarioan bizi diren emakume eta gizon guztiei" egin diete dei zapatuko agerraldietan parte hartzeko.
Osasuneko eta sektore publiko osoko murrizketak
Bestalde, eta bailaratik irten gabe, urriaren 21etik 25era bitartean, mobilizazio astea deitu du ELAk. Bi ekitaldi egingo dituzte: urriaren 22an, martitzena, Arrasaten, Debagoieneko Ospitalean (12:00) eta Bergarako anbulatorioan (13:00) kontzentrazioak deitu dituzte. ELAren esanetan, "helburua da osasungintzan, zein sektore publikoko gainerako zerbitzuetan, jasaten gabiltzan murrizketen aurkako protestaldia egitea".
ELAk dei egiten die "herritar guztiei" parte har dezaten.