Manifestazioaren bukaeran, Joxe Mari Eizmendik, Hik Hasiko ordezkaria, hiru mezu zabaldu zituen, denen izenean: Lomceri ezezko borobila; Eusko Jaurlaritzari eta Nafarroako gobernuari Wert legea hemen ez ezartzeko eskaera; eta gure herriak nahi duen hezkuntza eraikitzen jarraitzeko konpromisoaren aldarrikapena.
Debagoiendarrak ere Bilbon
Debagoienetik ere jende ugari joan zen Bilbora protesta egitera; hainbat herritatik irten ziren autobusak. Bertan izan ziren antzuolarrak ere. Bi pisuko autobusa txiki geratu zitzaien eta auto partikularrak ere erabili behar izan zituzten Bilbora heltzeko; ehun herritar inguru joan ziren guztira.
Antzuolako herritar talde bat.
Guraso, irakasle, ikasle eta ikasle-ohiek bat egin zuten manifestazioaren helburuekin. Egun batzuk lehenago zabaldu zuten orrian, gainera, argi adierazi zuten Antzuolako eskolan "atzera pausurik" ez dutela nahi eta hainbeste urtetan zehar eraiki duten hezkuntza eredua ez dutela "salgai": "Lomcek ikasleen eta ikastetxeen arteko leia bultzatzen du, zailtasunak dituzten ikasleak babes barik utzi, giza-balio unibertsalen ordez doktrina sustatu. Guk, berriz, uste dugu aukera-berdintasuna, elkarlana, ideia, izaera eta ahalmen ezberdinen errespetua direla kalitatezko hezkuntzaren oinarriak eta hiritar arduratsu eta kritikoak eraikitzeko bermea", adierazi du Antzuolako eskolako Pilar Etxanizek.
Lomceren kontrako pankarta ugari eraman zituzten manifestariek.