Hozkailuen ekoizpena Arrasatetik kentzearekin bat, langileak birkokatu egingo ditu Fagorrek. Batzuk Poloniara joango direla eta aurre-erretiroak ere egingo direla esan dute Fagor Etxetresnek. Oraingoz ez dago kopururik erabakita, izan ere, prozesu hori oraindik prestatzen dabiltza.
Aldaketa horiek krisi aurretik hasi zen prozesu baten kokatu ditu Fagorrek.
Egosketa eta garbiketa lerroak Arrasaten geratuko dira; horrez gain, beroketa lerroa Bergaran, termoak Basaurin eta lapikoak Eskoriatzan, Fagor Etxetresnetako ordezkariek esan dutenez.
Haierrekin adostutako neurria
Haierrekiko joint venturea irail hasieran jakinarazi zuten bi enpresek. Helburua da sektoreko erreferente bihurtzea. Joint venture horretan Haierrek % 51ko partaidetza du eta Fagor Etxetresnek % 49koa, eta akordioan Poloniako Wroclaw hirian hozkailuak ekoizteko planta berria eraikitzea, ustiatzea eta garatzea aurreikusten zen.