Euskara elkarteen indarra goraipatzeko bat egin zuten ehunka euskaltzalek atzo Soraluzen TopaEgunean

Ehunka euskaltzalek indarra erakutsi zuten atzo TopaEgunean Soraluzen. Deba ibarreko euskara elkarteek eta Euskaltzaleen Topaguneak antolatuta, festa egunean euskara elkarteen balioa ospatzea izan zen nahia, mugimendu sozial moduan, duten eragina erakusteko. Jolasak, musika, bertsoak... eta Jon Sarasuak liburua aurkeztu zuen: Hiztunpolisa. Egun osoko festan, arratsaldeko ekitaldian Deba ibaian bertan, petaloetan euskara elkarteen balioak erakusten zituen lorea osatu zuten ur-azalean elkarteetako ordezkariek: euskalduntasuna, auzolana, plazera eta plaza. Egunak utzitako irudia horixe izan zen. Debagoieneko euskara elkarteen eta Goienako ordezkaritza zabala ere izan zen Soraluzen.