Aretxabaletarrak hasi ziren dominatzen; jokoan beraiek aritu ziren finen eta golak sartzeko aukera gehien ere beraiek izan zituzten. Hala ere, partiduko lehenengo gola Aloñako Gaizka Zelaiak sartu zuen 27. minutuan. Txantxikuek izan zuten lehenengo aukera hori ondo aprobetxatu zuten, beraz. Atsedenera markagailua 0-1 jartzen zuela joan ziren.
Bigarren zatian, joko aldaketa
UDAkoak galtzen zihoazela ikusita, jokatzeko sistema aldatu zuten; hiru defentsarekin jokatzen hasi ziren. Aloñakoak, berriz, konfiantza gehiagoz eta lasaitasun puntu batekin hasi zuten bigarren zatia, baina UDAkoen joko aldaketarekin oñatiarren ateraino iristea lortzen zuten. Bigarren zatiko 22. minutuan etorri zen berdinketaren gola; UDAko Beñat Etxabek lortu zuen baloia Aloñakoen atean sartzea. Partiduak aurrera egin ahala, Aretxabaletakoek golak egiteko aukera gehiago zituzten baina berdinketarekin konformatu behar izan zuten.