25 dira dagoeneko aurten Hego Euskal Herrian lan istripuz hildako beharginak; sei, hilabete eskasean. Atzo, eguaztena, Antzuolan hildako azpikontratatutako langilea da azkena.
08:15ean gertatu zen istripua Deskargako autobidea egiteko lanetarako egokitutako pista batean, Altzeta baserrira bidean. Bertako lanetan zebilen kamioi bat pistatik atera eta 10 metroko altueratik behera erori zen. Ertzaintzatik azaldu zigutenez, gidaria harrapatuta geratu zen eta ezin izan zuten onik atera.
Moyua eta Antzibar enpresek aldi baterako osatutako UTE Lapatza enpresak du Deskargako autobideko lanen adjudikazioa, eta enpresa horrek azpikontratatutako Aballa S.L enpresarentzat ziharduen lanean hildako beharginak.
Prekarietatea eta lan erritmo gogorrak daude istripuaren atzean, ELA sindikatuaren esanetan: "Duela astebete salaketa bat jarri genuen neurriz kanpoko lanaldiak egiten direlako. Langileek 11 edo 12 ordu egiten dituzte egunero. Aparteko orduak ez direla ordaintzen eta oso erritmo azkarrean lan egiteko langileak presionatzen direla ere salatu dugu", azaldu zuen istripu lekuan izan den ELAko Manu Tenak.
LAB sindikatuarentzat, hilabete eskasean lan istripuz sei behargin hil izanak errealitatearen alde gordinena erakusten du. "Subkontratazioa, aldizkakotasuna, enpresen eta obren kontrol eza eta herrialdeko hitzarmenen urraketa sistematikoak" jo ditu horren eragiletzat, eta horiek aldatu ezean lan istripuak eta bestelako osasun galerak bere horretan mantenduko direla gehitu du.
Euskal gehiengo sindikala, istripu lekuan
Aldaketak mobilizazioan eta borrokan datza LABen esanetan eta, horregatik, elkarretaratzea deitu du ELArekin eta euskal gehiengo sindikala osatzen duten gainontzeko eragileekin batera: gaur izango da, 12:00etan, Antzuolatik Deskargara bidean, San Blas ermitako bidegurutzean, istripua izandako lekurako bidea hartzen den tokian.
CCOO, Bergarako plazan
Ordu berean beste kontzentrazio bat ere izango da, Bergarako plazan, CCOOk deituta.