Tokiko Agenda 21 administrazioaren jardunean iraunkortasunaren aldagaia txertatzeko eta politika publiko horiek ebaluatzeko metodologia bat da. Eta, metodologia hori erabilita, udalerriek ekintza planak egiten dituzte. Udalerrien tokiko ekintza planek ingurumenarekin lotutako arloak izan ohi dituzte ardatz: mugikortasuna, energia edo ur kontsumoa, naturaren babesa… Dena dela, iraunkortasun kontzeptua zentzurik zabalenean hartuta, herritarren bizi kalitatearekin, justizia sozialarekin eta ekonomia biziberritzerekin lotutako egitasmoek ere lekua izaten dute Tokiko Agenda 21en. Guztira, udalek eta garapen agentziek aurkeztutako 32 egitasmo lagunduko ditu diruz Foru Aldundiak.
Diru laguntza jasoko dutenen artean, mota guztietako ekimenak daude. Andoaingo Udalak zaraten mapa egingo du, adibidez; Arrasatekoak Potxotxo errekara doazen ur zikinak kolektorera bideratuko ditu; Donostiakoak eta Irungoak Tokiko Agenda ekintza planak berrituko dituzte; Hernanikoak anfibioak ugaltzeko urmael bat egingo du Epele bailaran; Ordiziakoak Oianguren parkearen balio naturalak leheneratuko ditu…
Energia eraginkotasuna nagusitu da
Hala ere, aurtengo diru laguntza deialdiko eskaeretan gai bat nagusitu da: energia eraginkortasuna. Arlo honetara bideratuko da, hain zuzen, diru gehien. Asteasuk udaletxeko isolamendu termikoa hobetzeko jasoko du dirua; Beasaingo eta Usurbilgo udalek, energia planak egiteko; Zarauzkoak, Oñatikoak eta Zumarragakoak, argiteria publikoa berritzeko; Elgoibarkoak, Altzola eta Sigma auzoetako argiteri publikoa ordezkatzeko; Hondarribikoak, Talaia Biteri ikastetxeko galdara sistemaren eta argiteriaren eraginkortasuna hobetzeko…
Ainhoa Iraola Ingurumeneko eta Obra Hidraulikoetako zuzendariak nabarmendu duenez, “esanguratsua da energiarekin lotutako zenbat eskaera jaso ditugun aurten diru laguntza deialdian. Nabari da interesa eta halako kezka dagoela gai honekin eta sentsibilizazioa ere areagotu dela jendartean; pozgarria da hori. Gipuzkoako Foru Aldundiak interes bera du, eta horregatik, eragile ez ezik, gidari ere izan nahi du geure lurraldean beste politika energetiko mota bat egiteko eta sorkuntza eta kontsumo ohitura eraginkor eta arduratsuak zabaltzeko. Apustu horrek ekimen zehatz eta sakonak ekarriko ditu, eta datozen egunetan emango dugu xehetasun horien berri”.
Tokiko Agenda 21 potentzialitate handiko tresna dela gaineratu du Iraolak: “Alde batetik, administrazio publikoen ekintza planak garatu, haiek ebaluatu eta betetze mailak herritarrei aurkezteko aukera ematen duelako. Bestetik, iraunkortasuna modu integralean garatzea ahalbidetzen duelako; ingurumenean eta arlo sozial eta ekonomikoan iraunkortasuna txertatzea, alegia”.