Biharko emanaldirako sarrera doakoa bada ere, Bergarako pilotalekurako txartelak 15 eurotan izango dira leihatilan salgai eta 12 eurotan, ohiko tokietan aurrez erosiz gero.
Bi kontzertu, bi formatu
Bergarako Udalak eta herriko tabernariek elkarlanean antolatutako emanaldia, San Martin jaien egitarauaren barruan dago. Deserriko Bandarekin igoko da taularen gainera, laukote moduan, Txus Aranburu (teklatua), Igor Telletxea (bateria eta xilofonoa) eta Ruben Caballero (gitarra akustikoa, gitarra elektrikoa eta mandolina) lagun dituela. "Oso argi nuen diskoa landuko nuen musikariekin egingo nituela zuzenekoak gero; teknikaria ere bera da, Haritz Harreguy" dio Eñaut Elorrietak. Kantuen zerrendaren gainean galdetuta, zuzenekoa Deserriko kantak diskoan oinarritzen duela dio, nahiz eta badiren beste batzuk ere errepertorioan: diskoan sartzerik izan ez zituen bi abesti eta Ken 7 taldearentzako konposatutako beste bi; horiek ere, deserri gaiarekin bat datozenak.
Bestelako asmoak ditu, berriz, zapaturako. Bakarrik eta formatu akustikoan joko du-eta Atxorrotzen. "Hasieratik harrapatu ninduen proposamenak, aretoetatik kanpo, mendian jotzeak, bakarka... magia berezia izango du, seguru. Ken 7ren diskoa grabatzen ari garenez, agenda konplikatua dudan arren, lortu nuen azkenean puzzlea egitea" dio Elorrietak. Kantu zerrenda ere ez da Bergarako bera izango: "Aukeratutako errepertorioa joko dut, bertan mugitzen den energia eta sinbologian oinarritutakoa. Deserriko kantak disko kantu batzuk, Ken 7ren diskoetatik beste batzuk eta baita espresuki emanaldi horretarako egin ditudan beste batzuk ere", dio, ilusioz.
Askotariko musikazaleentzako
Gustura dago diskoak izan duen harrerarekin, besteak beste, agendari erreparatuz: "Hitzak kontzeptualak diren arren mota guztietako publikoarentzako egindakoa da. Burutik baino gehiago, gorputzarekin eta emozioekin ulertzen den diskoa da eta horrek zabaldu egiten du publikoa".