Datorren astelehenean izenpetuko dute akordioa Patxi Lopezek, PSE-EEko idazkari orokorrak; EBBko buruak, Andoni Ortuzarrek; eta Iñigo Urkullu lehendakariak.
Besteak beste, ekonomia suspertzeko eta enplegua sortzeko plan bat adostu dute jeltzaleek eta sozialistek, 6.290 milioi eurokoa. Gainera, erreforma fiskalarekin eta iruzurraren aurkako borrokarekin 1.500 milioi euro gehiago lortuko dituztela aurreikusi dute. Egongo diren diru-sarreren erdia baino gehiago iruzurraren kontrako borrokan, ekonomia suspertzeko programen defizita handitzen, langabeziaren aurka egiten eta osasuna, hezkuntza eta gizarte laguntzak bere horretan, murrizketarik gabe uzten erabiliko dira.
Egileen esanetan, akordioak Euskadi "modernoago, solidarioago, iraunkorrago eta lehiakorragoa" egiten lagunduko du, eta ekonomia-jarduera, enplegua, euskal eredu soziala eta zerbitzu publikoak bultzatzen edo murrizketarik gabe edukitzen ere.
Erreforma fiskalari dagokionez, "tributazio-sistema errebisatu" egin dutela esan dute bi aldeek, "ekitatean" eta iruzurraren aurkako borrokan indarra eginez.
Lurralde Historikoen Legea errebisatu
Euskadiko erakundeen mapa erreformatu nahi dute ere EAJk eta PSE-EEk eta, azkenean, badirudi Lurralde Historikoen Legea berrikusiko dutela, datorren urtean udalen legea onartuko dutela eta Patxi Lopezek bere egunean egin zuen duplizitateen gaineko txostena osatuko dutela.