AEBetako ateak bezeroei irekitzeko, hitzarmen bat egin du Laboral Kutxak

Laboral Kutxak bere nazioarteko lehenengo hitzarmena sinatu du Ipar Ameriketako National Cooperative Bank banku-erakundearekin. Horren bitartez, bi erakundeek elkarrekin egingo dute lan AEBetan diharduten enpresen garapena eta lehia-gaitasuna sustatzeko.

Laboral Kutxako arduradunek diotenez, hitzarmen horren bidez kreditu kooperatibak AEBetako ateak ireki nahi dizkie bere enpresa bezeroei, merkatu amerikarrean banku-solaskide zuzena izan dezaten. Izan ere, Laboral Kutxaren ustez, "merkatu bakoitza ezberdina da eta enpresentzat behar-beharrezkoa da finantza-hornitzaile egonkor bat izatea doazen lekura doazela. Kasu honetan, Laboral Kutxako bezeroek National  Cooperative Bank-en sare osoa izango dute eskueran, banku-premiei irtenbiderik onenak bilatzeko".

Aurrerantzean, Mondragon Korporazioko kreditu-kooperatibaren bezeroek  kobrantzen eta ordainketen gestioa, epe luzerako proiektuen finantzaketa, bezeroen kobrantzak aseguratzea eta abar egin ahal izango dituzte AEBetan, NCBren eskutik.

Martxoan, Credit Cooperatif-ekin

Arduradunen esanetan, "Parisen egoitza duen Credit Cooperatif-ekin martxoan sinatutako hitzarmenari eta honako hitzarmen honi esker, aurrerapauso handia eman da Laboral Kutxaren apustu estrategikoan, hau da, ETE-ei internazionalizazio-prozesuan laguntzeko bidean". Laboral Kutxaren ustez, "prozesu oso garrantzitsua da enpresek epe luzera irauteko".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.