265 milioi haiek salmenten % 3,78 izan dira, eta horrek, Eroskiren iritziz, "merkataritza-jarduera garbiaren sendotasuna adierazten du".
Dena dela, 2012ko ekitaldiaren emaitza 121 milioiko saldo negatiboa izan da Eroskirendako, arrazoi hauengatik: "kontsumoaren ahultasunak eragindako salmenten beherakada, higiezinen sektorearen gelditasuna, aparteko baliabideak sortzeko bide eman ez duena; merkataritza-sarearen saneamendua; prezioen dokuntza; eta zorra 44 milioi eurotan murriztea". Prezioen doikuntza horri esker kontsumitzaileek 107 milioi euro aurreztu dituztela azpimarratzen du banaketa-taldeak.
Kooperatibista gehiago
Datu finantzarioez gain, 2012. urtean eta aurten ere, balio-kate osoan "jarduera aldatzen" eta denda-eredu berriak garatzen dabiltzala azpimarratu du Eroskik. Eta 2012. urtea Eroski Taldearen kooperatibizazio-prozesuaren barnean lehen kooperatiba eratu zuten urte gisa gogoratuko dutela diote arduradunek. Hain zuzen, Espainiako hainbat erkidegotan dituen langileak kooperatibista egiten dihardu Eroskik, 2009an onartu zuenaren arabera. Hipermerkatuetan dago prozesu hori aurreratuen, eta iaz, 15 erkidegoko 3.695 bazkide berri egin zituen Eroskik. Bestalde, Eroski Kooperatiba Elkarteak 9.338 bazkiderekin bukatu zuen urtea. Eroski Taldean, denetara, 38.420 langile zeuden urte bukaeran.