Inguruko herriekin alderatuta, Ormaiztegin eguraldia ezberdina ote den, aldaketak bat batekoak izaten diren edo kazkabarrari nola deitzen diogun galdetu zidan kazetariak. Eta kontatu nien gure herri hau "zuloan" dagoela eta, Zumarragan edo Gabirian garbi dagoen bitartean, guk oraindik ere lainopean jarraitzen dugula askotan; aldaketak ez direla hain zakarrak, aurten udaberririk izan ez badugu ere, ohikoena urtaroz urtaro aldaketa leunagoa izatea dela, Euskal Herri osoan moduan; eta kazkabarrari kazkaikoa ere esaten diogula. Gisa horretan aritu nintzen, euskaraz aurrena eta gazteleraz gero.
Eta herritar orok moduan, nik ere egin nien galdera: "Aizue, hau noiz aterako da?" (je, je). Eguna zehazteke dagoela eta erantzuterik ez, ordea. Berdin dio.
Etxeko tabernan harrapatu ninduten, lanean; lehengusua New Yorkera joan zaigu oporretan eta ahizpa zaharrenari laguntzen ari naiz aste honetan. Aspaldian askorik ez dut egin eta ahaztuta ote nengoen, baina bai zera! Bizikletan ibiltzearekin gertatzen den moduan, hau ere ez da ahazten. Gustura ari naiz, gainera, baina mantela kendu eta hanka egiteko gogoz ere banago.
Bihar arratsaldean izango da hori. Ni ere banoa, haize berrien bila. Ondo ibili eta bueltara arte!