Arte liberalak ikasketen barruan barruan eta Amaia Martiartu arrasatearraren eskutik, euskara, kooperatibak, eta Euskal Herriko politika, geografia eta kultura landu dituzte aurtengo ikasturtean Washington inguru hartan.
Arbasoak, euskaldunak
Orain, ikasitakoa ikusten dihardute gurean 19-23 urte bitarteko ikasle horiek. Esan beharra dago, gainera, bigarren eta hirugarren belaunaldiko euskaldunak direla gehienak. Hala, Fagor Ederlanen fundizioa ikusten izan dira Arrasateko Garagartza auzoan. Mikel Lezamizen laguntzarekin Laboral Kutxaren egoitzan izan ziren, Eskola Politeknikoa ere ezagutu dute, Otalora jauregian On Jose Maria Arizmendiarrietaren museoa ikusi dute, eta kooperatiben alorra borobiltzeko, Emun kooperatiba bisitatu dute.
Inguruak eta euskara ere bai
Gainontzekoari dagokionez, besteak beste, gazta zela egiten den ikusi dute, Gernika bisitatu dute, Donostia, Bilbo, Gasteiz eta Nafarroa ere bai… Urko Aiertza Amaiurko senatariarekin ere izan dira, Eskoriatzan lotan, eta akaso gehienondako deigarriena dena: AEKn euskara ikasten ibili dira. Euren irakasle den Amaia Martiartu arrasatearraren azalpenen arabera, helburua da behin Euskal Herrira etorrita bertakoa den hizkuntzaren ezagutza apur batekin buelta daitezela sorterrira.