Hiru debagoiendar Calafeteko 24 orduko patinatze maratoiko irabazleak

Uztailaren 20an jokatu zen, laugarren urtez, Calafeteko 24 orduko patinatze lasterketa. Jon Ander Egaña bergararrak eta Ainhoa eta Agustin Oianguren aramaioarrek parte hartu zuten, Joseba Arana zumaiarrarekin eta Tarracopatinako hiru patinatzailerekin batera -Jose, Miguel, eta Ramon-; elkarrekin taldea sortu eta 24 orduko lasterketan parte hartu zuten. Gizonezko maratoi kategorian lehiatu ziren -taldeko kide gehienak gizonezkoak izan ezkero, gizonen kategorian jokatzen dute-, eta lehenengo postua lortu zuten lehiatutako mailan. Sailkapen nagusian, ostera, zortzigarrenak izan ziren. Irabazteko esfortzu handia egin zutela adierazi dute. Izan ere, beroa, haizea, logura, nekea... pairatu zituzten. Guztira, 676 kilometro egin zituzten.