Sukaldaritzarako grina duten 14 eta 17 urte bitarteko 22 gazte elkartuko dira Zizurkilen kokatua dagoen Fraisoro baserrian. Egonaldi osoko egitaraua dute, eta sukaldaritzako sekretuak era praktiko eta atseginean ikasteaz gain, erabiltzen diren produktuak ezagutuko dituzte. Horretarako, irakasle eta chef baten eta aisialdiko bi begiraleren laguntza izango dute.
Jarduera eta txango ugari
Jarduera ezberdinak egingo dituzte: bisitaldia Basque Culinary Centerrera, abangoardiako tailerra egiteko; txangoak Donostiako Portura eta Arantzazuko Artzain Eskolara; pintxo-ibilaldia Donostiako Alde Zaharrean; bisitaldia Bretxako merkatura eta Ni Neu jatetxera Mikel Galloren eskutik; Gastro Gynkana; eta Donostiako traineru batean arraunean aritzea.
HAZIren laguntza
Aurten, gainera, HAZIren (landa eta itsas garapena sustatzeko Eusko Jaurlaritzaren korporazioa) laguntza izango du kanpamentuak. Gipuzkoan ez ezik, Bizkaian, Andaluzian eta Katalunian ere izango da, gastronomiarekiko grina adierazten duten neska-mutil guztiei esparru hori hurbilarazteko asmoz.