Arrasateko igerilekuetako sorosle Aintzane Arizmendik esan digu joan zen eguenetik hasi zela jendea animatzen eta egunotan jendez lepo daudela igerilekuak; aste honetan benetan disfrutatzen ari direla azaldu digu.
Gaztetxoek primeran pasatzen dute uretan jolasean, eta behin uretan nahikoa ibili ostean, gerizpean kartetan jokatzen dutela adierazi digute batzuk. Hamarretakoa ere eramaten dute igerilekura.
Sasoi honetan adin guztietako pertsonak joaten dira igerilekura; Arizmendi sorosleak esan digu goizetan nagusi gehiago egoten direla eta arratsaldetan gazteak eta familiak izaten direla.
Hamaken zerbitzua Arrasaten, bihartik
Bihartik aurrera, gainera, zerbitzu berri bat jarriko dute martxan Arrasateko Musakola kiroldegian; hamakak alokatu ahal izango dira. Belarretan ipiniko dituzte hamakok. Egun osorako alokatu nahi bada 3,5 euro ordaindu beharko da, eta egun erdiz alokatu nahi bada, berriz, 2,5 euro.