Pista estalian denboraldi ederra egin ostean Malen Ruiz de Azuak aire libreko denboraldiari bultzada galanta eman dio, Espainiako Txapelketa irabazi du-eta junior mailan. Castellón egindako 3,95 metroko saltoak eman zion urrezko domina –4,02 metroko saltoa egiten ahalegindu zen, Euskadi mailan duen marka pertsonala, baina ez zuen lortu– eta lehenengo postu horrek datorren astean Italian egingo duten Europako Txapelketarako ateak zabaldu dizkio. Arrasateko atletismoak, baina, beste albiste pozgarri bat jaso du asteburuan, Istar Dapenak Euskadiko errekorra ondu duelako, 4,52 metroko saltoa eginda. Orain arteko marka onena Javier Palomerok zuen, duela 21 urte egindakoa.
Asteburuko kirol albiste gehiago:
Aire libreko denboraldiari nahi besteko zukua atera ezinka zebilen Malen Ruiz de Azua, eta asteburuan Castellón egindako txapelketan kolpe bakarrean zuzendu du bidea. Izan ere, Jonathan Perezen ikasleak pista estalian negu aparta izan duen arren aire librean zailtasunekin zebilen. Baina, ohiko maila ona erakutsita, Super Amara BAT taldeko atletak urrea jantzi du, beste behin, Espainiako Txapelketa batean. Oraingoan junior mailan izan da, Clara Amat gaindituta (3,80). Eta urrezko domina horrek saria du, uztailaren 18tik 21era bitartean Italian (Rieti) egingo duten Europako Txapelketarako ateak ireki dizkiolako.
Errekor berria, Istar Dapenarendako
Malen Ruiz de Azuarekin batera, Istar Dapena ere albiste izan da asteburuan. 1992an Javier Palomerok 4,51 metroko saltoa egin zuen, eta ordutik hona marka hori izan da gazte mailako errekorraren muga ezarri duena. Zapatuan, baina, Durangon egindako ahaleginean Arrasateko atletak zentimetro batean gainditu zuen marka hori, eta 4,52ko marka ezarri du. Ea beste 21 urtez irauten duen.
ALBISTEAK ESKUKO TELEFONOAN
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Bidali ALTA 688 69 00 07 telefono zenbakira –Whatsapp bidez–.
TELEGRAM: Batu zaitez @GoienaAlbisteak kanalera.
ASTEBURUETAKO BULETINA
Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.
Harpidetza aukera guztiak
