2013-2014 urteetan bailarako garraio zerbitzuak herritarren nahierara egingo direla adierazi du Aldundiak: "Herritarrekin hitz egin nahi dugu, herritarren beharrak entzun nahi ditugu eta hortik aterako ditugu datozen urteetarako garraio publikoko zerbitzuak". Honetaz gain, bilerak egingo dira herritarrekin eta udalarekin.
Prozesua iraila-urrian martxan
Herritarrei begira iraila-urria inguruan hasiko da prozesua. 1. fasean, herritarren iritziak jasoko dira. 2. fasean, 1. faseko ekarpenak ebaluatuko dira, eta behar izanez gero ekarpen gehiago jasoko dira. Behin betiko proiektua 2014ko ekainean egongo litzateke, eta 2014ko urte amaierarako zerbitzu berriak martxan jarriko lirateke.
Parte hartzeko era ezberdinak
Prozesua herritar guztiei zabalik dago: erabiltzaileentzat eta erabiltzaile izan daitezkeenentzat. Bilerak interesa duten guztientzat izango dira. Parte hartzeko moduak, ostera, hiru izango dira: bilera irekiak, batetik. Bestetik, autobus egunak, herritarrekin interakzio zuzena izateko pentsatuak. Hirugarren aukera on-line izango da.
Debagoienaz gain, Gipuzkoako beste bailara batzuetan ere indartu nahi da garraio publikoa. Hain zuzen ere, Goierrialdean Urola-Debabarrenean eta Buruntzaldean.