Txernobilgo zortzi haur datoz Debagoienera uda pasatzera

Aurten ere Txernobilgo haurrak gurera etorriko dira udako hilabeteak pasatzera. Igandean, hilak 23, helduko dira Loiura eta guztira 272 haur etorriko dira 247 familiatara. Debagoienera zortzi etorriko dira; hiru Aramaiora, hiru Aretxabaletara, bat Arrasatera eta beste bat Bergarara.

Txernobil elkartetik, hilabete hauek hemen ematearen garrantzia azpimarratu nahi izan dute. Marian Izagirrek, elkarteko presidenteak esan duen bezala: "ez dute gaixotasun garaturik, baina erradiazioaren ondorioz, oso osasun ahula dute, baztertze-eremutik gertu bizi direlako. Hobekuntza agerikoa da lehenengo astetatik, eta gero, hobeto egiten diote aurre Ukrainiako neguari".

Aurten 53 haur lehenengo aldiz etorriko dira eta familiek egiten duten esfortzua eskertu dute elkartetik, haurrentzako oso lagungarria delako. Hala ere, familientzat batzuetan gogorra izaten dela esan du Izagirrek, haurrak kultura ezberdin batetik datozelako. Kasu horretan, Txernobil elkartekoek, laguntzaileak dituzte harrera familien galdera eta kezkak argitzeko.

Ekaina eta Abuztua bitartean hainbat ekintza antolatu dituzte elkartekoek haur eta familiek uda ahaztezina pasatu dezaten. Besteak beste: Donosti Cup futbol txapelketan parte hartuko dute, Cabarceno parkera joango dira edo birziklapen tailerrak egingo dituzte.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.