"Ibilbidea luzea izan da, proiektua jaio zenetik sei urte pasa baitira jada, eta lau urte proiektua aurkeztu genuenetik. Euskaltzaindiako egoitzan, hemen bertan egin genuen aurkezpen hartan, erronka bati heldu geniola adierazi genuen: euskara eta euskal kultura Interneten ikusgarri bilakatu nahi genituela; euskararen eta euskal kulturaren Interneteko presentziari, izanari, izena jarri nahi geniola", adierazi dute prentsaurrekoan.
Hurrengo urratsak
Hurrengo hilabeteetan PuntuEus Fundazioak ICANNekin kontratua sinatuko du, PuntuEus Fundazioari .eus domeinuaren administrazioa, kontrola eta kudeaketa delegatuko zaizkio. Eta ondoren, ICANNekin proba teknikoak egingo dituzte, .eus martxan jarri daitekeela ziurtatzeko. Azkenik, .eus domeinuaren bigarren inflexio puntua etorriko da, non webguneak .eus domeinuarekin erregistratu ahal izango diren. Hori 2014ko apirila inguruan gertatuko da eta bitartean, PuntuEus Fundazioak egutegi, urrats eta aukera guztien berri emango du.