Gaur izan da Kirola Euskaraz programaren ikasturteko azken saioa; aurrenekoa Bergaran egin zuten 2012ko azaroan eta abenduan Aretxabaletan.
Mojategi elkargune izan da ibarreko 300 neska-mutilentzat eta futbolaren bidez goiz pasa ederra egin dute. Partidu motzak jokatu dituzte 2002, 2003 eta 2004an jaiotako gaztetxoek; hauek Arrasate, Aretxabaleta, Oñati eta Bergaratik bertaratu dira.
11:00etan etenaldia egin dute eta Inazio Azkarragaurizar alkateak zein Igor Arenaza ekimenaren sustatzaileak hartu dute hitza. Euskara eta kirola uztartzearen garrantzia azpimarratu dute biek eta ondoren, zozketa egin dute gaur Mojategin aritu diren guztien artean. Hala, adin bakoitzeko lau sari egon dira, 12 guztira, eta horiek guztiek uztailaren 5ean Mondra-Reala ikusteko bina sarrera eskuratu dituzte, eta hiruk gainera, Realaren baloia eraman dute etxera.