Proiektuaren asmoa da euskal ikastoletako neska-mutilek kontzientzia hartzea sukaldaritzaren eta elikadura orekatuaren garrantziaz, baita familiek ere, hauek baitira ekimenaren motorra. Beraz, proiektuak hiru ardatz dituela esan genezake: ikastola, familia eta dendak edo supermerkatuak. Hauen bitartez, familiarteko sukaldaritzak eta elikadurak osasunean duten eraginaz kontzientziatu nahi du proiektuak.
Hasi da proiektua
Lehen urratsak eman ditu BCCren "Sukaldatu" kanpainak: Oñatiko Txantxiku eta Portugaleteko Astileku Ikastoletan eta ekainaren 4an, martitzenean, Elorrioko Txintxurri Ikastolan izango da.
Orain arte proiektua dastatu duten bi ikastoletan, 9 eta 11 bitarteko gaztetxoekin egin da ekimena: nutrizio-jarraibideei, elikatzeko ohitura osasungarriei eta bertako eta sasoiko produktuei buruzko azalpenak jaso dituzte, jakiak prestatzen lehen urratsak emateaz gain. Honez gain, Oñatiko Txantxiku ikastolan gurasoekin tailer bat egin zutela aipatzekoa da.
