Apirilean bilera irekia egin zuten udaletxean, Uema Egunaren zentzua azaldu eta prestaketa lanetarako taldea osatzeko. Rosa Mondragon euskara teknikariak azaldu digunez kultur talde eta eragile gehienek erantzun dute: "Taldeen parte hartzea eta inplikazioa eskertu gura dugu".
Aramaio, "herri dinamikoa"
Ramon Ajuria alkateak ere eskertu du aramaioarren inplikazioa: "Gustura eta ilusioz hartu dugu Uema Eguna antolatzea. Herri dinamikoa da gurea, eta herritar ugari inplikatu dira prestaketa lanetan. Herritarren esfortzua eskertu gura dut. Izan ere, eurei esker egitarau zabal eta erakargarria osatu ahal izan dugu. Aramaio ezagutzeko eta euskarari aire berria emateko aukera ederra duzue, eskuzabalik hartuko zaituztegu".
'Aire berria euskarari'
Aurtengo leloa da Aire berria euskarari; jaiak eta aldarrikapenak bat egingo dute beste behin. Egungo legea aldatzea eskatuko dute, "udalerri euskaldunen garapen linguistikoa" bermatzeko. Euskalgintzako eta instituzioetako hainbat ordezkari izango dira. Egitaraua haur, gazte eta helduei begira antolatu dute eta egun osoan ez da aspertzeko astirik izango. Eguraldia izango da etsaia, iragarpenen arabera: "Euria egiten badu kultur etxea eta kiroldegia ditugu erabiltzeko", diote.