Ertzaintzak informatu duenez, gaueko hamabiak eta erdietan izan zen erasoa. Gizonezkoa lur-orotariko ibilgailu baten joan zen gasolindegira, eta han zegoen langile bakarra pistola batekin mehatxatu du eta dirua emateko agindu dio. Langileak ezetz esan eta borrokan egin dute, eta azkenean erasotzaileak langileari kolpea eman dio buruan armarekin. Borrokaldian, ibilgailuaren leiho bat apurtu egin da. Gero, ihes egin du erasotzaileak ibilgailuarekin.
Langileak ebakiak eta kolpeak zituen buruan eta anbulantzia batek bertan atenditu du, eta gero Debagoieneko Ospitalera eroan du.
Ertzaintzak errepidean kontrolak ipini ditu eta ikertzen hasi da. Erasoa gertatu eta ordu betera, Ertzaintzaren patruila batek Aretxabaletan aparkatuta topatu du ibilgailua. Handik gutxira erasotzailea atzeman dute eta hark leporatutakoa onartu egin du. Bere esanetan, pistola ez zen benetakoa, eta gero errekara bota du. Ertzaintza armaren bila dabil orain. Erasotzailea lehendik ere atxilotuta egondakoa zen, eta Bergarako Ertzaindegian egon da epailearen aurrera eroan arte.