Egubakoitzean ekin zioten Acesma elkarteko kideek Arrasaten produktuak batzeari. Askotan egin dituzte honelako janari bilketak eta euren hitzetan, "jendeak oso ondo erantzun izan du". Azken elikagai bilketa hau duela bi hilabete Oñatin hasi zuten. Bertan Hermansoloña elkarteaz gain herriko Eroski, BM eta Dia izan zituzten alboan. Hezkuntza arloak ere dezente lagun zien; Elkar Hezi, Txantxiku eta Urgain ikastetxeetan ere elikagaiak bildu zituzten-eta.
Lekale, pasta eta azukreaz gain, higienerako produktuak eta sendagaiak ere batu dituzte. Azken hauekin laguntza estra bat izan dute, Oñatiko Juldain farmaziak sendagai dezente eman dizkie-eta. Batutako guztia klasifikatu ostean, produktuak Kubara eramango dituzte, baina horretarako oraindik ez dago data zehatzik.
