Atzoko agerraldian Bergarako eta Aramaioko Herrira-ko kideak, hainbat herritar, Aramaioko alkatea eta Alfonso Azkargorta Kantoren anaiak hartu zuten parte. Espetxe politika salatu eta "garai berrian, jarrera berriak" hartu behar direla adierazi zuten: "Aski da. Bizi osorako zigorra ezartzen duen espetxe politikari ezetz esan behar diogu. Behin eta berriz. Nahikoa da; 30 urte luzez irauten duen dispertsioa mantentzeaz. Ardurak hartu behar dira eta arduratsu jokatu", adierazi zuen Jone Arriolabengoak, Aramaioko Herrira-ko kideak.
Omenaldia eta bizikleta martxa
Kanto askatzea eskatzeko zapatuan, hilak 20, Aramaioko plazan ekitaldia egingo dute. Bertan Aramaioko herritarrek Kanto eta bere senideak omenduko dituzte. Eguerdiko ordubatean izango da. Apirilaren 27rako, berriz, Aramaiotik irten eta Bergaran amaituko den bizikleta martxa antolatu dute. Arratsaldeko lauterdietan irtengo da Bizente Goikoetxea plazatik eta Bergararaino osatuko dituzten 25 kilometroak, Aramaio, Arrasate eta Bergarako herritarrek eta hainbat eragilek osatuko dituzte. Kilometro bakoitzeko testigu bat pasako da, 25 kilometroak bete arte. Hau da, espetxean egin duen urte bakoitzeko kilometro bat.
Hilaren 22an, 25 urte espetxean
Luis Mari Azkargorta Kantok apirilaren 22an 25 urte beteko ditu espetxean. 1988an atxilotu zutenetik Espainiako hainbat espetxetatik pasatu da eta egun Zaragozako Zuerako espetxean dago.
16 urte espetxean pasa ondoren baldintzapean utzi zuten aske, 2003an. Orduan aramaioarrek ongi etorria egin zioten Bizente Goikoetxea plazan. Hala ere, 197/2006 doktrina ezarri zioten eta 2018ra arte luzatu diote kondena. Herrira mugimenduko kideek azaldu zutenez, Azkargortak 2006ko urrian kalean egon beharko luke, zigorraren hiru laurdenak beteta.