Eguzkia eta euria
"Egunetik egunera aldatu egiten da. Orokorrean, segurtasunik eza ikusten dut. Txandaka ibiliko da eguraldia; izan ere, borraskatxoak dabiltza inguruan. Eta haiek dantzariak izaten dira. Badatozela ikusten da bezperan, baina hurrengo egunean beste norabide bat hartu dutela ikusten da. Beraz, borraskatxoak gurera etorriz gero, euria ekarriko dute eta etorri ezean, eguzkia. Esan daitekeena da fronteak badatozela. Eta bien bitartean eguzkia izango dugula. Udaberri giroa izango dugu, bada: eguzkia eta euria, denetik apur bat. Eta lehenago ikusten zen elurretarako joerarik ez du izango", kontatu du Zabalak.
Egun zehatzei dagokienez, berriz, "osteguna ikusten da egunik politena".
Tenperaturak finko samar
Eta tenperaturei begiratuta, hortxe ikusten du frantziskotarrak egonkortasun apur bat: "Eguraldi aldakorra izan arren, goizean tenperaturak 7-10 graduren bitartean ibiliko dira, eta, egunak aurrera egin ahala, 14-18 gradu artean ibiliko dira, eguzki-euriaren arabera".