Sailburuaren esanetan, "aurrekontua % 15 handitzeak argi uzten du gobernu hau industriaren alde egiten ari den apustua. Laguntza garrantzitsua eta estrategikoa izan nahi dugu, eta enpresek aurrera egitea, beren hornitzaile-sarea mantentzea eta industriak zerbitzuen sektorea bultzatzea lortu nahi dugu".
Ekonomia aurrekontua % 25 txikitu den arren, Arantza Tapiak esan zuenez, aurreko ekitaldian "kreditu ugari atxiki" zituzten eta "ezin izan ziren gauzatu"; hortaz, aurrera eroandako aurrekontua baino % 9 txikiagoa baino ez da aurtengoa.
Honela banatu nahi ditu Arantza Tapiak bere sailerako dituen 396,3 milioiak:
Zuzendaritza horizontalak: 16.454.865 €
Teknologia, Berrikuntza eta Lehiakortasun Sailburuordetza: 141.593.567 €
Industria Sailburuordetza: 98.765.954 €
Merkataritza eta Turismo Sailburuordetza: 25.714.268 €
Nekazaritza eta Arrantza Sailburuordetza: 113.783.346 €
Tapiak baloratu egin du sailak industriaren alde egindako apustua, baliabideak urriagoak izan arren. Ekonomiaren Garapen eta Lehiakortasun Sailak 45 milioi euroko neurriak aplikatuko ditu, eta honako hauetara zuzenduko ditu: enpresen berregituraketa eta antolamendua; enpresa bultzatzaileen dibertsifikazioa, proiektu berriak martxan jarriz eta oinarri teknologikoko enpresa berrien sorrera lagunduz; eta langileek enpresetan parte hartzeko prozesuetan laguntzeko ekimen berri bat babestea.