Eskaintza hiru adin tarte ezberdinetako gazteei bideratuta dago; 9-12 urte artekoak Zerainera joango dira; 12-14 urte bitartekoak Arabako Otaza auzoko Garaion proiektuan parte hartuko dute, edota, Txatxilipurdik antolaturiko Orioko Zingira kanpinera joateko aukera izango dute. Eta 14-16 urte artekoak Kosta ala kosta abenturan parte hartzeko parada izango dute. Hauek Ozaetan hasiko dute ibilbidea eta Zarautzeraino joango dira oinez Euskal Herriko txoko ezberdinak ezagutuz. Esperientzia guzti hauekin, gazteengan kontzientzia piztea nahi dute.
Azken urte hauetan lortutako esperientzia erabiliz, abentura ahaztezinak bizitzeko aukera luzatu nahi diete ibarreko gazteei, euskara lokarri bezala izango dituzten udalekuetan. Hala ere, euskararen erabilera sustatzeaz gain, beste balore garrantzitsu batzuk jorratuko dituzte. Adibidez, gazteen autonomia, naturarekiko harremana, hezkidetza edota kultur aniztasuna.
Etzi, martxoaren 21ean, hasiko da izen emate epea, eta maiatzaren 10era arte posible izango da udako abenturetan parte hartzeko izena ematea Txatxilipurdi, Jardun eta Pil-pilean elkarteen egoitzan.