GI-632 errepidea itxi egingo dute, gauez, gaurtik hilaren 26ra, Bergarako sarrera eta Antzuola artean. Gipuzkoako Foru Aldunditik jakinarazi dutenez, GI-632 errepideko lanak direla-eta, beharrezkoa izango da errepidea erabat ixtea inguruko zuhaitzak botatzeko eta ondoren lurrean zuloa egiteko. Lan horiek 21,5 kilometro puntuan egingo dituzte Antzuola eta Bergarako sarreraren artean.
15 minuturo zabalik
Martxoaren 12an hasiko dira errepide mozketa horiek eta martxoaren 26ra arte iraungo dute. Gauez egingo dituzte lanak, domeka gauean hasi eta eguen gauera arte, 22:00etatik 06:00ak arte. Lanean ari diren bitartean errepidea erabat itxiko dute, baina 15 minuturo ireki egingo dute autorik izanez gero pasatzen uzteko. Hau da, autoek gehienez 15 minutu itxaron beharko dituzte pasa ahal izateko.
Prestaketa lanak astelehen gauean, martxoaren 11tik 12rako gauean, egingo dituzte. Errepidea ixteko seinaleak jarriko dituzte eta litekeena da zirkulazioari eragitea, arin bada ere.