25 bertso-eskola, 100 bertsolari, 20 gai-jartzaile. Horiexek dira Bertso Korrikaren zenbakiak. Bestela esanda, 25 herritan 100 bertsolarik eta 20 gai-jartzailek jardungo dute martxoaren 20ra bitartean bertsotan Araban, Bizkaian, Gipuzkoan, Lapurdin eta Nafarroan. Eta esandako moduan, gurean Arrasaten du hitzordua, martxoaren erdialdean.
Bost helburu
Ekimenaren helburuak bost dira: "Korrika girotzea herrian; euskara ikasten ari direnek bertso saio bat entzutea; herriko bertsolariei eta bertsolari gazteei kantatzeko aukera ematea; kalean (ostatuan) euskaraz elkartzea herriko euskal hiztunak eta euskara ikasten ari direnak eta herriko bertso-eskolaren eta euskaltegiaren artean harremanak egitea".
Bertso saioak, euskara ikasleen neurrira
"Bertso Korrikarekin bertsolaritzara hurbildu nahi dira euskara ikasleak. Haietako askorentzat bertso saio bat entzungo duten lehen aldia izango da. Horregatik, saioko azalpenak eta bertsolarien jarduna egokitu egingo dira, euskara ikasleek uler dezaten. Gainera, saioan zer topatuko duten, aurrez landuko dute euskaltegian, bertso-eskolako gai-jartzailearen eskutik. Bertsozaleentzat ere saio hauetako ateak zabalik daude, publikoan bertsozaleek eta euskara ikasleek bat egitea nahi baita", adierazi dute antolatzaileek.
Bertso Korrika, bertso batean
Bertso Korrikaren aurkezpenean, Beñat Vidalek, Algortako Bertsolari Eskolako kide, AEKko Mintzapraktika Egitasmoko arduradun eta Bertsozale Elkarteko kide denak, bertso batean azaldu du ekimena:
Euskaltegian lantzen ditugu
aditza eta baldintza
baina jolastuz bertsolariek
nola darabilte hitza?
Bertso Korrika iritsi zaigu
da zuretzako ekintza
euskara ikasten zabiltzan horrek
behar zenuen argi printza
denek ulertu eta gozatu
dezagun bertsolaritza