Partidu gogorra eta intentsitate handikoa jokatu zuten, zapatuan, Bergarak eta Oiartzunek, Agorrosinen. Oiartzuarrak bigarren postuan dira eta garaipena erdietsita, liderrarengandik puntu bakarrera kokatuko lirateke. Galdu ezinezko aukera zen. Eta baita lortu ere. Bergararen aurkako garaipenarekin, Garikoitz Argoteren mutilek puntu bakarrera daukate Hernani liderra. Norgehiagoka hasi eta berehala heldu zen bisitarien gola. Partiduko gol bakarra izango zena. Hortik aurrera, bi taldeek aukerak barra-barra izan zituzten.
Biak ala biak, garaipenaren bila
Lehen zatian oiartzuarrek izan zituzten gol aukera garbienak. Bergararrak, amorerik eman gabe, baloia handik eta hemendik jokatzen saiatzen ziren. Atsedenaldiaren ostean, Neca Galanen mutilek aukera gehiago izan zituzten. Indartsu hasi ziren, golaren bila. Hala ere, bigarren zatiko lehen ordu laurdena bete aurretik, Valeriori txartel gorria erakutsi zion epaileak eta, Bergara, jokalari bat gutxiagorekin gelditu zen. Hortik aurrera, giroa are gehiago berotzen hasi zen.
Txartelak barra-barra
Etxekoek gola nahi zuten baina Oiartzungo atzealdea sendo mantendu zen partidu osoan zehar. Aldi berean, oiartzuarrek aukerak izaten jarraitzen zuten, baina Soto atezainak ondo babestu zuen Bergarako atea.
Elurrak ez zuen apenas atsedenik eman baina harmailetan zaleak gero eta beroago eta haserreago zeuden epailearen erabakiekin. Bigarren zatiaren erdialdera etxekoek beste txartel gorri bat ikusi zuten, oraingoan Nafarrate atzelariak. Oiartzungo Txabarri ere kanporatua izan zen partiduaren amaiera aldera. Horiez gain, txartel hori ugari erakutsi zituen epaileak. Azkenean, Bergarak 0-Oiartzunek 1.
Lesakara begira
Sailkapeneko seigarren postuan daude bergararrak, 38 punturekin. Datorren jardunaldian, martxoko lehen asteburuan, Beti Gazteren aurka jokatuko dute Galanen mutilek. Joaneko partiduan, 4 eta 1 menderatu zuten bergararrek Lesakako taldea.