Izan ere, iragarrita zegoen moduan, arratsalde partean iluntzear dela, gogotik hasi da berriro ere elurra, goizean baino bustiago, gogotsuago. Eta bazterrak zuritzen hasi dira apurka-apurka. Iragarpenek diote ekaitzak horretan jarraituko duela gaur eta bihar. Herrizaingo sailak abisu laranja aktibatu du gaur 18:00etatik bihar 24:00ak arte, elurragatik. Elurra egingo du itsas kotaraino.
Goizean zehar Bergaran, Udal langileak espaloietan gatza botatzen ibili dira, elurra urtzeko.
Oñatin, bestalde, Udalak egindako deiari 60 boluntariok erantzun diote eta gatza botatzen jardun dute kalerik kale, espaloietan-eta.
Gatza botatzen goizean Oñatin eta Bergaran.
8etatik 10ak arte jardun du, elur gizia bazen ere, eta apur bat zuritu du, Arrasten esaterako.
Neurri prebentiboak hartuta
Hala ere, oraingo honetan, alertak aktibatuta daude atzo geroztik (horia atzo (egubakoitza), laranja gaur eta bihar); eta horrek dakartzan protokolo guztiak indarrean dira. Horrez gainera, Debagoieneko herrietan neurri bereziak hartu dituzte denboraleari aurre egiteko. Arrasaten, esaterako, arriskutsuak izan daitezkeen guneak zintarekin itxi egin dituzte.
Eta esandako moduan, momentuz, elurrak ez du inguruko errepideetako zirkulaziorik eragozten, eta ibilgailuak normal dabiltza joan-etorrian.
Goiz-arratsalde partean, errepideetan arazorik ez.
Hori bai, behin eta berriz esan duten moduan, gaur eta bihar, autoa behar-beharrezkoa denean bakarrik hartzea aholkatzen dute, eta errepidean kontuz ibiltzea.