Uholdeen protokoloa aktibatzen dutenean bi dira, bereziki, jarraitu beharreko gomendioak Segurtasun Sailaren arabera: erreka bazterrean dauden ibilgailuak erretiratu eta erreka ondoetan dauden txaboletan ez ibili. Horrekin batera, tokian tokiko udaltzaingoen betebeharra izango da erreken egoera zaintzea, eta horretan dihardute une honetan.
Eguraldia, hobetzen
Dena den, esandako moduan, momentuz ez dago kezkatzeko arrazoirik. Gainera, Euskalmeten arabera, "arratsaldean atertzeko joera hartuko du apurka-apurka. Elur-kota igo egingo da eta 500 m inguruan hasita, arratsaldean eta gauean 800-1000 m inguruan kokatuko da".
Bihar euria, baina gutxiago
Bestalde, Euskalmeten arabera, bihar euria egingo du berriro baina, "euri txikia izango da eta elurra tontor altuenetan baino ez du egingo. Euria goizean zehar egingo du batez ere eta arratsaldean kantauri isurialdean euria egingo du soilik. Elur-maila 800-1000 m-tik 1500 m-ra igoko da. Ipar-mendebaldeko haizea ibiliko da, goizean bolada gogorren batekin kostaldean eta mendi inguruetan. Tenperatura maximoek apur bat egingo dute gora".