Moyua eta Antzibar enpresek egingo dituzte Beasain eta Bergara arteko GI-632 errepidearen azken zatiko lanak, datorren astean hasita. Antzuolako lotunea izango du abiapuntu eta, hain justu, Antzuolako eta Bergarako herritarrei lana aurkezteko bilera irekia egin zuen atzo Gipuzkoako Foru Aldundiak Antzuolako Olaran etxean. Lan horiek inguruan eragin handia izango dute eta Aldundiak herritarrei zuzenean eman nahi izan dizkie azalpenak: "Herritarren kezkak eta kexak entzutea garrantzitsua da Aldundiarentzat, eta haiei erantzuna ematen eta bideratzen saiatuko da", adierazi dute.
Joseba Altube Gipuzkoako Foru Aldundiko Bide Azpiegituretako zuzendariak azalpenak emateaz gain, herritarren galderak erantzun zituen, eta haien eskakizunak jaso. Jesus Mari Elortza Bergarako alkatea eta Inma Beristain Antzuolako alkatea ere aurkezpenean izan ziren, baita Aldundiko teknikariak ere.