Horrekin batera, eskatu diete PPko gobernuarengandik etor daitezkeen erasoei gogor aurre egiteko, zituzten lan-baldintzak berreskuratuz, eta bide horretan, "ezinbestekoa" den Euskal Herriaren eta bere instituzioen erabakitze-ahalmena aldarrika dezatela.
Sektore publikoko langileak, udal eta mankomunitateetakoak barne, eskubide zein lan-baldintzen etengabeko murrizketak eta enplegu publikoaren galera jasaten ari direla salatu dute: "Lan eskaintza publiko berrien eta langileen ordezkapenen debekua, elkarkidetzaren ekarpenenak bertan behera uztea, lanaldiaren luzapena, lan-bajen kasuetan lansariak jaistea, opor eta baimen egunak galtzea, soldaten jaitsierak (azken adibidea, abenduko aparteko lansaria galtzea), eskubide sindikalen mugapena…".
Foru- eta toki-instituzioek modu ezberdinetan jardun dutela eta, ondorioz, udal eta foru sektoreko langileen lan-baldintzak desberdinak direla azaldu dute, eta horri gehitu diote Madrilgo gobernuak iragarri dituen neurri berrien aurrean "babesgabetasun eta ziurgabetasun" egoeran daudela.