Ekonomiaren Garapen eta Lehiakortasuneko sailburuak eta Confebaskeko presidenteak Euskadiko enpresen eta ekonomiaren egungo egoera kontrastatu zuten eta erakunde bien arteko lankidetza-bide berriak aztertu zituzten.
Bileran, ordezkari nagusi horiez gain, honako hauek ere parte hartu dute: Eusko Jaurlaritzako Industria eta Energiako sailburuorde Juan Ignacio García de Motiloak, eta Confebask-eko idazkari nagusi Nuria López de Gereñuk.
Bileran, Euskadiko industria garatzeko lankidetza sendotzeko konpromisoa hartu zuten. Horretarako, Arantza Tapia sailburuaren hitzetan, beharrezkoa da, besteak beste, neurri hau hartzea: berrikuntza eta teknologia eraginkortasun handiagoz aplikatu behar dira herrialdeko enpresa-proiektuetan, eta balio erantsi bat gehitu behar zaie, kanpoko merkatuetan lehiakortasun handiagoa eta posizio hobea lortzen laguntzeko.
EAEko ekonomia suspertzeko beharrari buruzko usteak ere trukatu zituzten; izan ere, horrela "saihestuko litzateke egungo krisiak eragin duen arazo larria", hau da, enpresak eta enplegua suntsitzea. Halaber, euskal produkzio-sarea lehiakorrago bihurtuz, helburu hori lortzen laguntzen duten bideak eta ekimenak landu beharra adierazi zuten.
Euskal enpresek duten likidezia-zailtasunei dagokienez, Eusko Jaurlaritzak eta Confebaskek bere gain hartu zuten finantza-bide eta -iturri berriak elkarrekin aztertzeko erantzukizuna.