Aurtengo txakolinaz gehiago jakiteko Kataideko Jabier Arregirekin izan gara, eta honek usain onekoa eta garbia dela azpimarratu du. Aurtengo mahats produkzioa oso ona izan da, eta horrek eragin zuzena izan du ardo zuri honen produkzioan. Uda parteko eguraldia oso lagungarria izan dela esan du Arregik eta beste urte batzuetan baino askoz ere gutxiago tratatu behar izan dute mahatsa, hori dela eta, uzta ona eta oparoa izan da.
Kataide eta Upaingoa Getarian
Gaur, Getariara, Debagoieneko bi txakolindegi joango dira: Arrasateko Kataidekoa eta Oñatiko Upaingoa, gurean upategia duten ekoizle bakarrak eta Getariako denboraldi aurkezpenean parte hartzeko ezinbestekoa delako upategia izatea. Hala ere, gurean, beste txakolin ekoizle batzuk badaude. Adibidez, Arrasaten, Artazubia baserriko Otxia, eta Oñatin, Murgialdai, Belaskuena eta Ditxosuena baserrikoak, azken hauek, mahatsa beste upategi batzuetara saltzen dutenak.
Aukera ona da gaurko Getariakoa txakolin ekoizleentzat: 2 ordutan 2.000 botilatik gora dastatuko direlako eta aurtengo salmentei begira garrantzia handia duelako gerturatutakoei gustatu izana, produkzio gehiena hemen saltzen dutelako. Hala ere, pixkanaka txakolin ekoizleak ere kanpora begira hasi dira.