Lurjausia izan den tokian guztiz moztuta dago bidea, baina inor ez dago inkomunikatuta. Izan ere, hiru baserritara doa lurjausiaren ondorioz itxita dagoen bidea: Arregi nekazaritza turismora eta beste bi baserritara. Nekazaritza turismora heltzeko beste bide bat ere badago, Errotatxoko bizilagunek kalean pasa dute gaua bart eta beste baserrian ez da inor bizi.
Pare bat pinu erori dira Errotatxo baserrira bidean.
Lanak
Orain lurra kendu eta bidea berriz ere erabilgarri jartzeko lanak hasiko dituzte. Udaltzaingotik adierazi digutenez, bazkalostean ekingo diete lanei. Lau lagunek jardungo dute egiteko horretan, baina zaila ikusten dute gaur bertan bukatzea, lan handia dagoelako egiteko eta garaiz iluntzen duelako. Bidea libratzea izango da lehentasuna, eta arriskua eragiteko moduan egon daitezkeen harri eta pinuak erretiratzea. Pinudiaren jabearekin harremanetan jartzea izango da hurrengo egitekoa, aurrera begira halakoak gerta ez daitezen zein neurri hartu aztertzeko.
Erreka hazita Olakua auzoan.