Asier Sarriegi Kirol zuzendariak hitz egin du lehenik eta esan du ia sinestezina egiten dela Zegama bezalako herri txiki batean elite mailako nazioarteko proba hau egiten jarraitzea, eta garbi adierazten duela Gipuzkoa txikia izanagatik handia dela maila altuko kirol probak antolatzen.
Ondoren, Edurne Albizu Zegamako alkateak hartu du hitza, gogoratuz probak geroz eta oihartzun handiagoa duela eta antolaketan eta 300 herritarrek musu-truk egiten duten lanari esker, espainiar estatuko Mendi Federazioak aitorpen bat egin diela probaren antolaketa bikainagatik eta bertan bizitzen den giro bikainagatik.
Probaren inguruko xehetasunak azaltzeko berriz, bertan izan dira ISFko (International Skyrunning Federation) kide Goio Larrañaga eta Amezti mendi elkarteko zuzendari tekniko Ainhoa Txurruka.
Nola eman izena
Izena emateko modu bakarra www.kirolprobak.com webgunean dagoen formularioa betetzea izango da. Telefonoz edo posta elektronikoz egiten diren eskaerak ez dira onartuko.
Ondoren zozketa egingo da, otsailaren 22an, 19:00etan, Zegamako udaletxean. Zozketa publikoa izango da eta, beraz, edonork izango du zozketara joateko aukera.
Dortsala egokitu zaien partaideen zerrenda zozketaren hurrengo egunean, hau da, otsailaren 23an, argitaratuko da hemen. Informazio gehiago, webgune horretan bertan.